Mga punto ng pagtutugma: android phones at ating henerasyon

      Sa mga panahon ngayo’y bumibilis ang pagpapaunlad sa maraming aspekto ng ating buhay, sa mga pamamalakad sa ating mga pang-araw-araw, at sa pamamalakad din ng mga bagay na ating ginagamit para sa pakikipagkomunikasyon sa iba. Ang aking tinutukoy ay isa sa mga niyayakap na makabagong teknolohiya ng mga Pilipino—ang Android phones. Lumabas sa isang survey na “sa rehiyon ng South East Asia, ang Pilipinas ang mayroong pinakamataas na Android penetration rate na umabot sa 91%” (Pinaroc, 2013).  

            Ano nga ba ang Android? Ito ay isang operating system na dinebelop ng Android Inc., at ngayo’y pagmamay-ari na ng Google. Ayon sa The Verge (2011), ito ay opisyal na nakilala ng publiko noong ika-22 ng Oktubre taong 2008 sa porma ng HTC Dream. Ilan sa mga tinataglay na na pundasyon nito ay: (1) pull-down notification window, kung saan makikita sa isang listahan ang lahat ng mga transaksyon ng cellphone gaya ng mga mensahe at email; (2) pagsuporta sa home screen widgets; (3) Gmail integration; (4) at ang central na bilihan ng mga aplikasyon—ang Android Market.

            Ano ang mayroon dito kaya tinatangkilik ito ng mga tao? Dinisenyo ito “para sa mga touchscreen devices kaya kapansin-pansin na mayroon itong user interface na direktang nagmamanipula ng mga proseso at gawain ng sistema sa pamamaraang tugma sa realidad gaya ng pag-swipe, pagdirekta ng hawak pakaliwa, kanan, papaliit, at papalaki” (Android.com). Isa pang halimbawa ay sa tuwing naglalaro ang isang indibidwal ng racing, nagagawa nitong maramdaman na siya ay talagang naglalaro sapagkat hindi mo kinakailangang pindutin sa screen kung kakaliwa ba o kakanan, kundi, imamaneobra mo mismo ang iyong cellphone at susunod ito sa direksyon. Samahan pa ng mga vibrations, porma ng haptic feedback, tuwing bumubunggo o nasasagi sa gilid. Ang accelerometers, gyroscopes at proximity sensors ang siyang may responsibilidad sa makatotohanang karanasan sa pagmamanipula ng cellphone.

            Isa pang alas nito ay ang pagiging personal nito o customizable. Sa mga Android phones, mayroon kang kapangyarihang palit-palitan ang theme ng cellphone mo kahit saan at kahit kailan na sa ayon mo. Mayroong live wallpaper kung saan hindi lang basta imahe ang makikita mo kundi gumagalaw na imahe at maaaring may interaksyon pa sa tuwing pinipindot mo o shinishake mo ito. Mayroon ka ring kakayahan upang tanggalin at magdagdag ng mga aplikasyon na nasa iyong homescreen.

            Pagdating naman sa pamamahala ng baterya at memorya, praktikal ang sistema na pinograma rito. Ito “ay dinisenyo rin upang hindi masyado mag-consume ng baterya” (Verge Staff, 2011). Kung ang Facebook mo’y hindi mo ginagamit ngunit nananatiling nais mo pa ring makakuha ng mga notipikasyon, magagawa mo ito nang hindi nagagawang mabawasan ang baterya. Kumbaga’y naka-idle lamang ito. Hindi mo na kinakailangan pang magsimula sa wala at sa parehong oras ay wala masyadong masasayang na baterya mo.

            Ang panahon ngayon ay tinaguriang “me generation” o mataas na pagbibigay-halaga sa sarili sa pamamagitan ng pagseselfie at pagpapaskil ng mga updates sa mga social networking sites. Kasama na rin dito syempre ang pagpili sa ayos at disenyo ng iyong personal na pagmamay-ari. Sakto sa timing ang Android phones, saktong-sakto sa ating panahon.

Batis:

Pinaroc, Joel, 2013. The Philippines continues to embrace Android. ZDnet.                 http://www.zdnet.com/the-philippines-continues-to-embrace-android-7000024072/. March 4,    2014.

Verge Staff, 2011. Android: A visual history. The Verge. http://www.theverge.com/2011/12             /7/2585779/android-historyverge staff. March 4, 2014.

 Android. Android information. Creative Commotions 2.5. http://source.android.com/tech/             input/touch-devices.html. March 4, 2014.

Guevarra, Julie Ann Olino

2012-25207